கடந்த பிப்ரவரி 24 ஆம் தேதி உக்ரைன் மீதான தாக்குதலை தொடங்கிய ரஷ்யா, கெர்சன் நகரை மட்டுமே கைப்பற்றியதாக கூறப்படுகிறது. கீவ் மீதான தாக்குதல் தோல்வியில் முடிந்தது. இடையே புச்சா படுகொலைகள் பிரச்சினையால் ரஷ்யா மீது சர்வதேச அளவில் அதிருப்தி எழுந்தது.
இதையடுத்து தனது போர் வியூகத்தை ரஷ்யா மாற்றியது. கீவ் பகுதியில் இருந்த படைகளை கிழக்கு உக்ரைன் பகுதிக்கு நகர்த்தியது. மரியுபோல் நகரைக் கைப்பற்றினால் டான்பாஸ் எனப்படும் கிளர்ச்சியாளர் கட்டுப்பாட்டுப் பகுதி மற்றும் கிரிமீயாவுடன் இணைத்து விடலாம் என்ற திட்டத்துடன் இடையில் உள்ள மரியுபோல் நகருக்கு ராணுவம் குறி வைத்துள்ளது.
அந்த நகரம் கடந்த 7 வாரங்களாக ரஷ்யப் படைகளின் முற்றுகையின் கீழ்தான் உள்ளது. ஆனால், தற்போது நகரை தங்கள் கட்டுப்பாட்டில் கொண்டு வர தாக்குதலைத் தீவிரப்படுத்தியுள்ளது. ரஷ்ய படைகளை தொடர்ந்து எதிர்க்கும் அளவிற்கு ஆயுதங்கள் இல்லை என்பதால் இன்றைய போரே இறுதிப் போராக இருக்கும் என்று மரியுபோலில் உள்ள உக்ரைன் ராணுவ படைப்பிரிவு முகநூலில் பதிவிட்டுள்ளது.
தாங்கள் பின்தள்ளப்பட்டு விட்டதாகவும், சிலருக்கு மரணம், சிலருக்கு சிறை என்றும் குறிப்பிட்டுள்ளது. இந்த நிலையில் மரியுபோலை கைப்பற்ற முழு வேகத் தாக்குதலை ரஷ்யா முன்னெடுத்துள்ளது.
