ஆதிதிராவிடர் மற்றும் பழங்குடியினர் நலத்துறை சார்பில் சென்னை தலைமைச் செயலகத்தில் முதல்வர் மு.க.ஸ்டாலின் தலைமையில் மாநில அளவிலான விழிப்புணர்வு மற்றும் கண்காணிப்பு குழு கூட்டம் நடைபெற்றது. இந்த கூட்டத்தில் விடுதலைச் சிறுத்தைகள் கட்சித் தலைவர் தொல் திருமாவளவன் கலந்துக்கொண்டு பின்னர் செய்தியாளர்களைச் சந்தித்தார்.
அப்போது பேசிய அவர்,
விடுதலை சிறுத்தைகள் கட்சியின் கோரிக்கையை ஏற்று சமபந்தி போஜனம் என்பதை சமத்துவ விருந்து என மாற்றி அறிவித்திருக்கும் முதல்வருக்கு எங்கள் நன்றியை தெரிவித்துக் கொள்கிறோம். விடுதலை சிறுத்தைகள் கட்சியின் கோரிக்கையை ஏற்று ஆதிதிராவிடர் பழங்குடியினர் ஆணையம் அமைத்து அதற்கு உறுப்பினர்களை நியமித்து செயல்பட வைத்திருக்கும் முதல்வருக்கு நன்றி தெரிவித்து கொள்கிறோம்
வன்கொடுமை தடுப்பு சட்டத்தின்கீழ் பதியப்படும் வழக்குகளில் 11% வழக்குகளில் மட்டுமே தண்டனை வழங்கப்பட்டிருப்பது அதிர்ச்சி அளிக்கிறது. வன்கொடுமை தடுப்புச் சட்டத்தில் சாட்சிகளை பிறழ் சாட்சிகளாக மாற்றும் கொடுமைகள் நடக்கிறது அதனை தடுக்க நடவடிக்கை எடுக்க வேண்டும். சாதி மதங்களின் அடிப்படையில் வன்கொடுமைகள் அதிகரித்து வருகிறது.
எனவே அதனை தடுக்க தனி உளவு பிரிவு அமைக்க வேண்டும் என்ற கோரிக்கையை முன்வைத்துள்ளோம். அதனை பரிசீலிப்பதாக முதல்வர் தெரிவித்துள்ளார். சமத்துவ புறங்களில் கட்டப்படும் வீடுகளின் எண்ணிக்கையை 100 லிருந்து 150 ஆக அதிகரிக்க வேண்டும். அந்த வீடுகளின் பரப்பளவையும் விரிவுபடுத்த வேண்டும்.
ஆர்.எஸ்.எஸ்-ன் கனவு திட்டத்தை நடைமுறைபடுத்த பாஜக ஆட்சி செய்து வருகிறது. இந்தியாவின் பன்முகத் தன்மையை சிதைக்க முயற்சி செய்கிறது. இந்த போக்கை விடுதலைச் சிறுத்தைகள் கட்சி மிக வன்மையாகக் கண்டிக்கிறது.
இந்தித் திணிப்புக்கு எதிர்ப்பு தெரிவித்த இசையமைப்பாளர் ஏ.ஆர்.ரஹ்மானை சங்பரிவார் அமைப்புகள் சமூக வலைதளங்களில் கடுமையாக விமர்சித்து வருகிறது. இந்த போக்கை அவர்கள் கைவிட வேண்டும். ஜனநாயக போக்கை கடைப்பிடிக்காமல் அச்சுறுத்தல் ஏற்படுத்துவது எந்த வகையிலும் ஏற்புடையதல்ல என்று தெரிவித்தார்.
